साम्बाको उपचारका लागि कतार फुटबल सङ्घलाई पत्राचार गरेका छौँः एन्फा

फागुन १२,  मंगलबार
पोखरा– अखिल नेपाल फुटबल सङ्घ एन्फाले राष्ट्रिय महिला फुटबल टोलीकी कप्तान सावित्रा भण्डारी ‘साम्बा’ को उपचारका लागि कतार फुटबल सङ्घलाई पत्राचार गरेको बताएको छ ।
यसअघि साम्बाले आफ्नो उपचारमा सहयोग नपाएको बताएपछि एन्फाले प्रेस विज्ञप्ति निकालेर पत्राचारबारे जानकारी गराएको हो । साथै साम्बाको आग्रहअनुसार परराष्ट्र मन्त्रालयमार्फत उपचारसम्बन्धी आवश्यक समन्वयका लागि पत्राचार गरिसकेको एन्फाको भनाइ छ ।

हिजो सम्बाले एन्फा र सरकारबाट उपचारका लागि सहयोग नपाएको भन्दै सामाजिक सञ्जालमार्फत सहयोगको अपील गरेकी थिइन् । अस्ट्रेलियन ए लिग फुटबल खेल्ने क्रममा डेढ महिनाअघि साम्बाको घुँडामा चोट लागेको थियो । वेलिङ्गटन फिनिक्समा आबद्ध उनी ब्रिस्बेन रोअरसँगको खेलका क्रममा विपक्षी टोलीकी गोलकिपरसँग ठोक्किन पुगेकी थिइन् ।