हिजो बेलुकी देशका धेरै ठाउँमा हुरीबतास, चट्याङ र वर्षाः आज पनि पानी पर्ने

चैत ३, मंगलबार 
पोखरा — काठमाण्डौ उपत्यकासहित देशका धेरै ठाउँमा हिजो बेलुकी हुरीबतास, चट्याङ र असिनासहितको वर्षा भएको छ । हुरीबतासले केही ठाउँमा घरका छाना उडाउनुका साथै रुखहरु ढलेका छन् भने असिनापानीले तरकारीबालीमा क्षति पुगेको छ ।
आज पनि दिउँसो र बेलुकीपख मेघगर्जन र चट्याङसहित पानी पर्ने मौसम पूर्वानुमान महाशाखाले जनाएको छ । महाशाखाका अनुसार आज दिउँसो कोशी, बागमती र गण्डकी प्रदेशको हिमाली भूभागका थोरै ठाउँहरुमा तथा बाँकी हिमाली भूभागका एक, दुई ठाउँमा मेघगर्जन र चट्याङ्गसहित हल्का वर्षा र हिमपातको सम्भावना रहेको छ ।
कोशी, बागमती र गण्डकी प्रदेशको पहाडी भूभागका एक, दुई ठाउँमा मेघगर्जन र चट्याङ्गसहित हल्का वर्षाको सम्भावना रहेको छ । यस्तै राति कोशी, गण्डकी र कर्णाली प्रदेशको हिमाली भूभागका एक, दुई ठाउँमा मेघगर्जन र चट्याङ्गसहित हल्का वर्षा र हिमपातको सम्भावना रहेको महाशाखाले जनाएको छ । अहिलेको सिजनमा बिहानपख मौसम सफा भए पनि दिउँसो र बेलुकीपख हावाहुरी र चट्याङसहित वर्षा हुने भएकाले सतर्कता अपनाउन मौसमविदले आग्रह गर्दै आएका छन् ।