गण्डकीका १४ हजारभन्दा बढी कर्मचारी निर्वाचनमा खटिने

मंगलबार, फागुन ५, 
पोखरा ।
यही फागुन २१ मा हुने प्रतिनिधिसभा सदस्य निर्वाचनका लागि गण्डकी प्रदेशमा १४ हजारभन्दा बढी कर्मचारी खटिने भएका छन्।  प्रदेशका ११ जिल्लामा रहेका दुई हजार ३९६ मतदान केन्द्रमा छ जनाका दरले १४ हजार  ३७६ जना कर्मचारी खटिने प्रदेश निर्वाचन कार्यालय पोखराका सूचना अधिकारी रुद्रप्रसाद न्यौपानेले जानकारी दिनुभयो । 
एउटा मतदान केन्द्रमा एक, एक जना मतदान अधिकृत र सहायक मतदान अधिकृत, तीन जना सहायक कर्मचारी, एक जना कार्यालय सहयोगी र तीन जना स्वयंसेवक खटिने उहाँले बताउनुभयो । 
जिल्लामा रहेका मुख्य निर्वाचन अधिकृतको कार्यालयमार्फत कर्मचारी व्यवस्थापनको काम भइरहेको छ। छनोट भएका मतदान अधिकृत, सहायक मतदान अधिकृतलगायत कर्माचारीलाई तालिम दिएर मतदान केन्द्रमा पठाइने कार्यालयले जनाएको छ। 

गण्डकी प्रदेशका ११ वटै जिल्लामा गरी एक हजार २९७ मतदानस्थल र दुई हजार ३९६ मतदान केन्द्र रहेका छन्। प्रदेशमा १८ लाख ७० हजार ६५ मतदाता रहेका छन्। 

यहाँ सबैभन्दा बढी कास्कीमा तीन लाख आठ हजार ५ सय ७२ र सबैभन्दा कम मनाङमा सात हजार मतदाता रहेका छन्। स्याङ्जामा दुई लाख ४८ हजार ८ सय १६, तनहुँमा दुई लाख ५४ हजार ३ सय ९७, नवलपुरमा दुई लाख ६८ हजार ५ सय २६, गोखरामा दुई लाख २९ हजार ५८ र बागलुङमा एक लाख ९३ हजार १ सय ८१ मतदाता छन्।

यस्तै, लमजुङमा एक लाख ३७ हजार १२४, पर्वतमा एक लाख २५ हजार ४ सय ६६, म्याग्दीमा ८६ हजार ३ सय ९७ र मुस्ताङमा ११ हजार ३ सय ३८ मतदाता रहेका छन्। प्रदेशका कुल मतदातामध्ये नौ लाख १४ हजार ५३५ पुरुष, महिला ९ लाख ५५ हजार ५ सय १६ र अन्य १४ जना रहेका छन्।

गण्डकी प्रदेशमा विसं २०७९ को प्रतिनिधिसभा सदस्य निर्वाचनमा १६ लाख ६२ हजार २ सय ४६ मतदाता रहेका थिए। हालको चुनावमा २ लाख ७  हजार ८ सय १९ नयाँ मतदाता थपिएका हुन्। गण्डकीमा १८ प्रतिनिधिसभा सदस्य निर्वाचन क्षेत्र रहेका छन्।